O Consello Regulador Denominación de Orixe Rías Baixas editou un libro con motivo do 25 aniversario da súa creación, "Rías Baixas, el vino del mar, o viño do mar, the wine of the sea". Unha publicación en tres idiomas galego, español e inglés con textos de Cristino Álvarez e fotografías de Xurxo Lobato.

O proxecto expositivo recolle un ano de traballo do prestixioso fotógrafo coruñés retratando durante as catro estacións a transformación da paisaxe, as súas luces, as súas néboas… Ademais, mostra as características da D. O. Rías Baixas: os tipos de viñedo en espaldera, as singulares parras, o característico minifundio e as modernas plantacións. Imaxes impactantes e que fan gozar ao visitante, achegándolle ao universo dun dos mellores viños brancos do mundo.

Paralelamente fíxose unha exposición itinerante que xa pasou polas principais cidades galegas: A Coruña, Cambados, Vigo, Pontevedra e Santiago de Compostela.

A intención da mostra é dar a coñecer o viño albariño, onde e como se cultiva, así como aspectos da arquitectura dos pazos que acollen moitas das adegas.

Xurxo Lobato é licenciado en Xeografía e Historia pola Universidade de Santiago de Compostela e académico da Real Academia Galega de  Belas Artes.

Na actualidade é fotógrafo colaborador de El País, Mundiario, Luzes, Sermos Galiza, Getty Images. Foi redactor xefe de fotografía de La Voz de Galicia. Dirixe o festival de Fotografía Olladas. Coordina o premio de creación fotográfica Luis Ksado da Deputación da Coruña.