A AGAEC (Asociación Galega de Arte e Cultura) móstralles a través desta exposición unha variada selección de obras de diferentes artistas pertencentes a ela.

A proxección do pensamento do artista, expresado nun lenzo, nunha escultura, ou en calquera manifestación plástica, a través desta mostra, pretende que as ventás do cerebro, os ollos, do artista e do observador conflúan, vexan o mesmo e logren que o binomio artista-obra faga unha metamorfose máxica e pase ao trinomio artista-obra-observador.

Con esta exposición os artistas tratan de representar algo que está por enriba da nosa realidade diaria, dos quefaceres diarios, das rutinas, da monotonía, de todo o regulado. Asimesmo pretenden que os visitantes desta exposición vexan o que hai detrás de cada trazo, que participen das súas obras e que, en definitiva, logren chegar ata as claves da súa sensibilidade.

AGAEC é unha entidade creada no ano 2004, e ten como finalidade difundir e promover a arte e cultura galega en tódalas súas manifestacións.

Os artistas asociados a AGAEC traballan tentando fomentar a interculturalidade, abrindo novas canles de coñecemento e expansión da riqueza intelectual dos creadores, mesmo desenvolvendo o intercambio con outras comunidades fóra de Galicia, así como con outros países máis alá das nosas fronteiras.