Camilo López, influente industrial feito a si mesmo, parece sufrir unha doenza mental. O médico recoméndalle como terapia trasladar as súas experiencias a un caderno. O texto, que se desenvolve nun aparente caos, non é tan veraz como o empresario pretende mostrar porque, aos poucos, a enfermidade de Camilo provoca que a narración se volva cada vez máis difícil de seguir. A continuación do diario pola súa irmá Inés nos descrubrirá a realidade xenuína á vez que desvela os episodios desvirtuados e os segredos que Camilo tratou de ocultar.

Marcelino F. Mallo, escritor coruñés cunha ampla traxectoria empresarial, inicia a súa carreira literaria  cos relatos contidos en Cabilia. Tamén en lingua galega publica tres novelas: A trenza, Klásicos  e Pallarega. En 2015 decidiu escribir, xa en castelán, El Danubio no pasa por Buenos Aires, que foi cualificada pola crítica de "…tan amena como inquietante e tan liviá como culta..."