Presentación do libro "Cartas de buena amistad. Epistolario de Emilia Pardo Bazán a Blanca de los Ríos (1893-1919)", de Ana Mª Freire López e Dolores Thion-Soriano Mollá
O epistolario de Emilia Pardo Bazán a Blanca de los Ríos constitúe o corpus máis nutrido da correspondencia da escritora reunido ata o momento. Consta de 39 cartas e 45 billetes e cartóns, e abarca desde 1893 ata 1919; 27 anos de amizade ininterrompida entre ambas as escritoras, que comparten nas súas cartas confidencias literarias, sociais e familiares, de gran interese para o mellor coñecemento da persoa e da obra de Emilia Pardo Bazán e, de modo indirecto, da de Blanca de los Ríos.
Intervirán no acto de presentación, ademais das súas autoras, José Manuel González Herrán, catedrático da Universidade de Santiago de Compostela.
Meirás (Sada), A Coruña ou os balnearios de Mondariz e A Toxa. Son os lugares nos que durante 27 anos Emilia Pardo Bazán (A Coruña, 1851-Madrid, 1921) datou as cartas que enviaba á súa amiga Blanca de los Ríos Nostench (Sevilla, 1862-Madrid, 1956).
O epistolario é o froito dun laborioso labor de procura, xa que algunhas destas cartas atopábanse en Estados Unidos, outras na Biblioteca Nacional de España pero non estaban localizadas, e hainas que seguen en mans dos descendentes de Blanca de los Ríos, que autorizaron a súa publicación. Unha das dificultades engadidas foi que algunhas cartas estaban sen datar, polo que foi necesario consultar diarios e arquivos para situalas.
Toda a correspondencia pertence á época de apoxeo de Emilia Pardo Bazán como escritora, á súa etapa de definitiva residencia en Madrid, que comezou no outono de 1890 e dilatouse ata o final da súa vida. Anos durante os cales Emilia e Blanca compartiron inquietudes persoais e profesionais, proxectos literarios e teatrais, problemas familiares e de saúde, intrigas electorais no Ateneo e ata detalles da construción do que hoxe coñecemos como pazo de Meirás.
Ana Mª Freire López é catedrática de Literatura Española na Universidade Nacional de Educación a Distancia (Madrid).
Dolores Thion Soriano-Mollá é catedrática de Literatura Española na Université de Pau.
