Numerosas personalidades que onte enarboraron as bandeiras da esquerda son hoxe destacados adaíles do liberalismo. Non é o caso do autor deste libro, sempre afastado de toda tentación socialista ou nacionalista: en resumidas contas, totalitaria. Este ensaio pretende arroxar luz sobre a mentira. O autor considera que o remedio aos agudos problemas da España de hoxe ten que saír do seo do pobo, dunha mocidade que con valor crea en si mesma e non desista na esperanza.

O libro será presentado por Xulio Xiz, xornalista e director de Galicia Digital; e Julio Rico Esteban, letrado en exercicio do ICAM.

DOMINGO GOÁS CHAO (Vilalba, Lugo, 1935) estudou no colexio dos xesuítas de Vigo. Obtivo a licenciatura en Dereito pola Universidade Complutense, especializándose logo en Dereito Urbanístico.

Foi asesor da Dirección Xeral de Promoción de Turismo no ministerio correspondente e da Comisión Central de Saneamento do Ministerio de Gobernación, ademais de director do Departamento Inmobiliario da Unión Resinera Española S. A. Colaborou en diversos proxectos turísticos públicos en Brasil e Venezuela.

Foi o primeiro avogado español que interveu en Estrasburgo ante a Comisión Europea dos Dereitos Humanos contra o Goberno da Confederación Helvética, experiencia que deu lugar á súa obra Una aventura europea. Actualmente prepara a publicación de dúas novas novelas.