Este proxecto artístico nace na Costa da Morte grazas á vontade de Cristina Torre Cervigón, esposa do pintor coruñés Julio Pujales, e como homenaxe ao seu marido, falecido en 1998 aos 55 anos e quen sentía unha grande atracción por esta vila mariñeira. Julio Pujales, aínda que se estableceu en Madrid sendo moi novo, sempre tiña presente a Galicia na súa obra.

O museo da Fundación Torre-Pujales está ubicado nunha casa rehabilitada na rúa Real de Corme e alberga entre as súas paredes unha extensa colección de arte contemporánea, maioritariamente pintura.

No interior do edificio destaca a escaleira metálica de caracol realizada de modo artesanal polo arquitecto Carlos Hurtado Casanova, autor do proxecto orixinal do museo, en colaboración co forxador local Cándido Cancela, ao mesmo que a pirámide da terraza.

Boa parte das obras que integran a colección foron adquiridas polo matrimonio Torre-Pujalte, pero outras moitas proceden do intercambio da obra propia do pintor con outros pintores.

O museo iniciouse cunha impresionante colección de artistas de renome e tamén máis descoñecidos, sobre todo españois e galegos, pero tamén internacionais. Antonio Saura, Eduardo Arroyo ou Lucio Muñoz son algúns dos grandes mestres con obra neste museo, pero os nomes presentes nas salas cóntanse por decenas. Desta maneira, a Costa da Morte une a súa enorme beleza paisaxística e a súa personalidade mítica á arte de vangarda.

A axenda de actividades do museo é moi ambiciosa, xa que os seus responsables teñen a intención de realizar talleres didácticos, exposicións temporais e itinerantes, coordinar talleres impartidos por artistas da bisbarra de Bergantiños, incentivar o turismo e dar cabida a conferencias, encontros culturais e seminarios.

A colección pretende seguir crecendo a través das obras dos artistas a quen se lles adxudiquen as bolsas que concede a Fundación.