O salón de actos da Casa de Galicia de Madrid encheuse para a homenaxe de Asomega ao profesor Manuel Sánchez Salorio (A Coruña, 1930-2023), insigne catedrático, académico, doutor honoris causa e artífice do Instituto Galego de Oftalmoloxía, ademais de creador da escola pronto coñecida en Europa como "The baby school de Santiago", viveiro de profesionais e docentes que ocuparon cátedra en varias universidades españolas, e que contou  coa presenza do presidente do Parlamento de Galicia, Miguel Santalices, que inaugurou oficialmente devandita homenaxe. 

Durante o evento interviñeron tres destacados membros de Asomega: o seu presidente, Julio Ancochea, o vicesecretario da Xunta Directiva, Julián García Feijóo, e o socio fundador Julián García Sánchez. 

Na inauguración, o presidente da Asociación de Médicos Galegos glosou a figura destacando o seu papel "como dinamizador, como revulsivo, como inconformista e, en ocasións, incómodo transformador de estruturas, de formas de facer e de esquemas de pensamento. Todo iso acompañado dun posicionamento ante a vida e dun entendemento claro do papel que desempeñamos como seres humanos cara aos demais e cara a un mesmo".

Ancochea lembrou que Sánchez Salorio foi merecedor do terceiro Premio Nóvoa Santos de Asomega, en 1998, e referiuse ao  pronunciou entón e que considera "un pequeno tesouro que gardo xa para sempre". Nel defendía o profesor a necesidade de "facer coincidir e integrar na vida persoal o gusto pola clínica e pola asistencia co pathos da curiosidade propio da investigación e da docencia". 

Pero falaba, ademais, do "modelo de tribo" que ofrecía a Universidade en referencia ao traballo en equipo que forxa o carácter persoal, da necesidade de exercer un liderado creativo, loitador e soñador, ou do seu compromiso con Galicia, lembrando que logrou o obxectivo de que todo paciente oftalmolóxico galego puidese ser atendido na súa terra. 

Por último, agradeceu ao profesor Julián García Sánchez, "alma deste evento", a iniciativa do acto e o seu compromiso con Asomega, da que é socio fundador.  Interviñeron o catedrático de Historia da Universidade de Santiago Ramón Villares, que se centrou na vertente humanística de Salorio, e Bieito Ledo que, como editor do seu libro de artigos "Os soños de Procopio", glosou a súa faceta como articulista e intelectual.