No ano 2012, Ano Santo, o pintor fixo o tramo da Ruta Xacobea, Camiño Francés, entre Mogarde (Lugo) e Compostela, en pouco máis de tres días; e desde hai varios anos pasa en familia algúns días en verán nas Rías Baixas na Mancomunidade de Val Miñor, preferentemente. Destas experiencias familiares entrañables recompiladas primeiramente en fotos, e plasmadas posteriormente en debuxos, acuarelas e pintura acrílica, xorde esta colección.

Para esta exposición o artista ofrécenos unha colección de "cadros que son unha mestura de luz e cor e, sobre todo, creatividade, innovando, como ao longo de toda a súa carreira como pintor", tal e como nos conta Inmaculada Gil Ruiz, historiadora da Arte e Estilista de Indumentaria, no prólogo do catálogo da mostra.

O pintor utiliza cores moi puras inspiradas na natureza, reflexo das impresións do artista nesta  contorna, de maneira máis simbólica que académica, en especial o místico violeta que o inunda todo, pero tamén o vermello luminoso, o verde relucente, o azul cerúleo ou o óxido azul verdoso propio da pintura simbolista, en concreto de Marc Chagall.

RAFAEL GIL CERRACÍN (Madrid, 1943). Aparellador, profesor e artista plástico. Estudou Arquitectura Técnica na Universidade Politécnica de Madrid, debuxo, gravado e modelado na Escola de Artes Aplicadas e Oficios Artísticos de Madrid e na Escola de Aprendices da Fábrica Nacional de Moeda e Timbre. Metodoloxía didáctica. Debuxo asistido por computador.

Participou en numerosas exposicións individuais e colectivas.