Na parroquia de Muimenta, por iniciativa dos empresarios da zona, celébrase desde 1992 unha festa gastronómica na súa honra, coincidindo co Día dos Traballadores, o 1 de maio, que constitúe unha xornada de convivencia entre veciños e forasteiros e unha reafirmación do espírito rural e do seu futuro na comarca.

Filloeiras e filloeiros afánanse na elaboración de miles de filloas (auga, fariña, sal e ovo, aínda que tamén se fan sen ovo) que se degustan xunto co churrasco e os chourizos criollos, que son o complemento gastronómico típico desta festa. Así, ao recinto feiral, onde artesáns como zoqueiros, ferreiros ou cesteiros venden as súas creacións e fan demostracións en vivo dos seus vellos oficios, o público achégase para comer ou só para comprar as filloas e degustalas en casa.

A Festa da Filloa de Muimenta, que naceu como iniciativa para recadar fondos para a organización da Mostra Exposición de Muimenta (Moexmu) –un certame anual de carácter gandeiro, no que ten lugar a Exposición de Raza Loura Galega e o Concurso de Raza Frisoa, ademais de exposición de maquinaria agrícola e unha poxa de gando selecto–, ten hoxe personalidade propia, e recibe anualmente ao redor de 25.000 persoas. Grazas a ela, os habitantes da zona devolveron a filloa ao lugar preponderante que lle correspondeu sempre na gastronomía da zona e recuperaron para as súas casas os ferros típicos na súa elaboración. 

Foi declarada de Interese Turístico Galego en 2008.