- O acto contou coa presenza do Conselleiro de Sanidade da Xunta de Galicia, Julio García Comesaña, que clausurou as xornadas.

Julio Ancochea, presidente de Asomega, expuxo no seu discurso as razóns que motivaron a elección dos institutos de investigación sanitaria como receptores da última Insignia de Ouro da entidade. Considera que estas entidades "desempeñan ese papel crucial, que tan bos resultados está a dar en toda España, de conectar o académico e o asistencial para facer efectiva a imprescindible visión e aplicación práctica que dá todo o seu sentido á actividade científica". 

Os centros recoñecidos son o Instituto de Investigación Sanitaria de Santiago (IDIS), o Instituto de Investigación Biomédica da Coruña (Inibic) e o Instituto de Investigación Sanitaria Galicia Sur (IIS Galicia Sur) de Vigo. O tres, dixo Ancochea, "aglutinan as cuestións fundamentais que definen a Asomega: docencia, investigación e asistencia como eixos da acción sanitaria".
Lembrou que a Asociación de Médicos Galegos aposta por "a ciencia con rigor e o Medicamento con alma”, un propósito difícil, "pero ao noso alcance se somos capaces de atopar as doses axeitadas de perfeccionamento profesional, afán de superación, capacidade de recuperación ante os fracasos e ambición para ir sempre un paso máis aló".

Antes de recibir a insignia de mans do presidente, interviñeron as tres directoras científicas dos institutos. Mariluz Couce, do IDIS, adiantou uns datos da memoria de 2022 que indican que "somos 1.161 profesionais integrados en 106 grupos de investigación e publicamos 1.003 artigos cun índice de impacto medio de 8,4 puntos". En canto a captación de recursos, obtivéronse case 44 millóns de euros, e "máis do 50% en proxectos de investigación competitiva". 

Pola súa banda Mar Casteláns, directora do Inibic, afirmou que o feito de que unha comunidade como Galicia teña tres institutos acreditados é unha gran noticia e "permite a moitos profesionais acceder a oportunidades de financiamento e a algo tan complicado hoxe como é a atracción de talento investigador".
Respecto ao trato que se da aos profesionais da investigación, afirmou que, como organización, "debemos ser capaces de tomar as medidas necesarias para que os profesionais con inquietudes innovadoras e científicas poidan desenvolver este potencial nas contornas nos que se formaron".
Neste sentido destaca o papel dos clínicos "que dedican o seu tempo a pensar o que ninguén pensou, o que esixe facilitar a carreira investigadora nos centros nos que realizan a súa actividade clínica", e criticou que os problemas burocráticos entorpezan en moitas ocasións a culminación dun proceso investigador para eles, o que "xera frustración e non incentiva aos profesionais".

Pola súa banda Eva Poveda, a directora científica do IIS Galicia Sur, puxo a énfase no compromiso coa sociedade galega no labor que fai o instituto, ao lembrar que “a nosa institución está plenamente comprometida cos principios da investigación e innovación responsables que promoven unha ciencia máis aberta, máis inclusiva e igualitaria, que teña en conta as inquietudes e expectativas da sociedade". Lembrou que xa no IIS Galicia Sur promóvense actividades que facilitan a interacción "coas asociacións de pacientes, centros educativos e a cidadanía en xeral para traballar conxuntamente e trasladar os resultados á práctica clínica á sociedade”.
Poveda concluíu a súa intervención agradecendo de novo a Asomega este recoñecemento “e aos máis de 900 profesionais que forman parte do IIS Galicia Sur polo seu traballo, esforzo e compromiso coa institución e a sociedade”.

O acto pechouno o conselleiro de Sanidade da Xunta de Galicia, Julio García Comesaña, que ademais de felicitar ás galardoadas e a Asomega pola II Feira da Saúde celebrada na Casa de Galicia en Madrid, cuxo colofón foi este acto de recoñecemento, puxo en valor a acción dos institutos de investigación sanitaria.

Para o conselleiro, os institutos constitúen "o lugar ideal" para a captación de talento e encaixan coa aposta da Xunta "por visibilizar o talento feminino para avanzar cara unha igualdade real entre mulleres e homes”. Segundo explicou, a Xunta traballa para mellorar as condicións laborais dos profesionais destes centros con "a tramitación dun decreto regulador para o estatuto do persoal investigador, que vai mellorar a súa calidade laboral".

Por outra banda, enxalzou o traballo realizado por Asomega en áreas tan importantes para a saúde como o coñecemento científico, a investigación ou a innovación remarcando, así mesmo, que simboliza a excelencia clínica, a innovación e investigación de calidade, así como a atención multidisciplinar e o coidado centrado no paciente.