José Ramón Ónega participa na presentación en Madrid de produtos galegos certificados
O delegado da Xunta de Galicia en Madrid, José Ramón Ónega, participou hoxe na presentación de produtos galegos certificados da Denominación de Orixe Protexida Arzúa-Ulloa, da Denominación de Orixe Ribeira Sacra e da Indicación Xeográfica Protexida Ternera Gallega que os seus consellos reguladores realizaron na explanada do madrileño Estadio Bernabéu, dentro dunha actividade promocional que están a realizar por diferentes cidades españolas.
A campaña promocional pretende dar a coñecer as características destes produtos de calidade representativos da gastronomía galega, as súas calidades e o proceso de control para garantir a súa orixe e trazabilidade, tanto aos profesionais do sector da distribución e da hostalaría coma ás asociacións de consumidores, escolas de hostalaría e medios de comunicación. Durante a presentación puidéronse degustar os queixos de Arzúa-Ulloa, a carne de Ternera Gallega e os viños da Ribeira Sacra.
Nela participaron, entre outros, os presidentes dos tres consellos reguladores: Xosé Luis Carrera Valín, presidente C.R.D.O.P Arzúa-Ulloa; José Manuel Rodríguez González, presidente C.R.D.O. Ribeira Sacra; e Jesús González Vázquez, presidente C.R.I.X.P. Tenreira Galega.
