O delegado da Xunta de Galicia participa na celebración do Día de Galicia organizada polo Centro Galego da cidade
O delegado da Xunta de Galicia en Madrid e director da Casa de Galicia, José Ramón Ónega, participou o 20 de xullo na tradicional celebración do Día de Galicia en Madrid que organiza o centenario Centro Galego da cidade. Nos actos, tamén acompañaron os directivos do Centro, o seu presidente, Fernando de Castro López-Villarino, e secretaria xeral, María Lage, entre outros, o cardeal arcebispo de Madrid, Antonio María Rouco Varela, o letrado maior do Consello de Estado Leopoldo Calvo Sotelo e numerosos amigos e simpatizantes da entidade. O Centro Galego de Madrid distinguiu recentemente a Ónega nomeándolle Presidente de Honra.
O programa de actos da recoñecida entidade para conmemorar o Día de Galicia comezou pola mañá cun oficio relixioso celebrado polo cardeal Rouco Varela na catedral de La Almudena, en cuxa explanada houbo unha exhibición de folclore galego a cargo dos grupos de centros galegos de toda a xeografía nacional que acudiron para a ocasión, tras a cal tivo lugar un multitudinario xantar nas instalacións do Centro.
Continuou ao caer a tarde cun pasacalle no que os grupos folclóricos, ataviados con traxes típicos, pasearon a súa música polas céntricas rúas de Bailén, Maior, Carretas, Praza de Jacinto Benavente e Praza Maior, onde a partir das 21 horas tivo lugar o Encontro Nacional de Bandas de Gaitas e Grupos Folclóricos, que gozaron os veciños e visitantes da cidade.
