Madrid, 23 de xaneiro de 2012. - A presidenta do Parlamento de Galicia, Pilar Rojo, apostou hoxe por "favorecer o funcionamento regular das institucións parlamentarias, simplificando o coñecemento das súas normas e procedementos para todos". Pilar Rojo fixo estas reflexións este mediodía, no acto de presentación do "Manual de actuación do Parlamentario", coordinado polo letrado oficial maior da Cámara Galega, Xosé Antón Sarmiento, e editado por El Derecho. O acto desenvolveuse nas dependencias da Casa de Galicia en Madrid, coa presenza de, entre outros, o delegado da Xunta de Galicia en Madrid, José Ramón Ónega.

Na súa intervención, o titular do lexislativo galego recordou que a publicación deste libro ten a súa orixe na estratexia que vén desenvolvendo o Parlamento de Galicia dende o inicio da actual lexislatura, "impulsando numerosas actividades de formación e perfeccionamento dirixidas tanto aos deputados coma ao persoal da Cámara e aos xornalistas que cobren a información parlamentaria".

O libro presentado hoxe busca, a través dunha linguaxe amena, que foxe das citas doutrinais e inclúe mapas conceptuais que facilitan a comprensibilidade, "achegar a realidade dos nosos diferentes parlamentos a un público heteroxéneo".

Pola súa banda, Ónega cualificou a obra de excepcional e resaltou que dá resposta "aos principais interrogantes sobre o funcionamento do lexislativo" e "facilita o camiño do parlamentarismo".

Manual propio para a Cámara galega

Rojo Noguera avanzou que nos próximos días, o Parlamento de Galicia presentará o seu propio "Manual Parlamentario", que está "orientado especificamente aos deputados e deputadas da Cámara galega, e tamén a xornalistas e todas aqueles que teñan interese en coñecer os mecanismos que rexen o día a día do noso lexislativo, a través dun texto actualizado e de áxil lectura".