José Ramón Ónega, delegado da Xunta en Madrid e director da Casa de Galicia deu a benvida aos integrantes do equipo de Viña Costeira e dirixiulles unhas palabras para desexarlles "todos os éxitos do mundo. Estades na vosa Casa e así nos gustaría que sentísedes", á vez que lles comentou que o viño estivo sempre presente na súa vida, dado que provén dunha familia de vinateiros en Mosteiro, Pol, "que non é terra de viños e por iso ían compralos ao Bierzo". Pola súa banda, o presidente da Cooperativa, Andrés Rodríguez, agradeceu "tanto o ofrecemento como as facilidades dadas. Estamos seguros que con estes ingredientes vai ser unha xornada moi intensa e produtiva".

Ademais do presidente de Viña Costeira, acudiron á Casa, a directora Comercial, Inmaculada Bernal; a delegada en Madrid da compañía, Elena Hermoso; e o enólogo Manuel Sánchez. Todos eles explicaron aos asistentes as características propias dos diferentes viños, espumosos e augardentes.

Viña Costeira supón o 40 por cento da DO Ribeiro; conta cuns 600 pequenos produtores; cada ano a colleita ofrece máis de catro millóns de botellas e é o viño branco máis consumido en Galicia. Ademais, e diso síntese especialmente orgullosa a directora comercial Inma Bernal, "en 2017 foi elixida como mellor adega do ano polos internautas de Verema. ¡Como para non estalo!".

Desde hai dous anos adquiriron unha nova adega, Pazo de Toubes, do século XVIII, con cepas plantadas en terrazas de pedra e que produce os viños da gama máis alta.

Reciben unhas dez mil vistas cada ano porque contan cun equipo de enoturismo permanente. "Pechamos en Nadal, Ano Novo e pouco máis", sinala Bernal.

A xornada, que se iniciou ás 12 e finalizou pasadas as 21 horas, e estivo amenizada pola tarde polo dúo de jazz Damy Soul.

Para máis información en www.costeira.es e en inma@costeira.es.